“ජාතික පුනර්ජීවනය සඳහා එක් වෙමු” නිදහස් දින පණිවිඩය – ජනපති
ශ්‍රී ලංකාවේ 77 වන නිදහස් දිනය වෙනුවෙන් ජනාධිපති අනුර කුමාර දිසානායක මහතා විසින් නිකුත් කරන ලද පණිවිඩය පහත දැක්වේ.
“අද අපි 77 වැනි ජාතික නිදහස් දිනය සමරන මේ මොහොතේ අපි එය කරන්නේ නව ආකාරයක නිදහසක් පිළිබඳ බලාපොරොත්තු සහ අපේක්ෂාවන් ඇතිව.
ශ්‍රී ලංකාවේ ඉතිහාසය ආවර්ජනය කරමින්, උතුර, නැගෙනහිර, බටහිර සහ දකුණේ ජනතාවගේ සාමූහික ප්‍රයත්නයෙන් ගොඩනැගුණු රජයක් සමඟින් අපි දැන් නව මාවතකට අවතීර්ණ වී සිටිමු. මේ මොහොතේ, සමෘද්ධිමත් ජාතියක් – සුන්දර ජීවිතයක් නැවත ගොඩනැගීමේ අභියෝගය භාර ගැනීමට අපි එක්ව සිටිමු. පසුගිය ශතවර්ෂය තුළ අපට අහිමි වූ සහ මගහැර ගිය දෙයක්.
“අපේ අනාගත පරපුර වෙනුවෙන් අපි අපේ ජාතිය නව තලයකට ඔසවා තැබිය යුතුයි. එය තම ලෙයින් සහ කඳුළින් යුතුව සාක්ෂාත් කර ගැනීමට අපේ ඉතිහාසයේ සිටි සියලුම විරුවන්ගේ අපේක්ෂාව විය. එබැවින්, තනි තනිව සහ සාමූහික වශයෙන්, අප සමාජ, පාරිසරික සහ සදාචාරාත්මක මූලධර්ම මගින් මෙහෙයවනු ලබන නවීන, සංවර්ධිත ශ්‍රී ලාංකික ජාතියක් ගොඩනැගිය යුතුය.
“නව රජය ලෙස පසුගිය මාස හතර තුළ අපි ස්ථාවර ආර්ථිකයකට අඩිතාලම දමා නව දේශපාලන සංස්කෘතියක් හඳුන්වා දී නව දේශපාලන පරමාදර්ශයක් සඳහා කැපවී සිටිමු. ජාතිවාදයෙන් හා ආගම්වාදයෙන් තොර – සමානාත්මතාවයෙන්, ගෞරවයෙන් සහ සංවේදනයෙන් එකිනෙකාට සලකන සමාජයක් සඳහා අපි උත්සාහ කරමු. ග්‍රාමීය දරිද්‍රතාවය තුරන් කිරීමට ප්‍රමුඛත්වය දෙන අතරම මහජන සහභාගීත්වය සහ නීතියේ ආධිපත්‍යය තුළින් පාලනය කිරීම කෙරෙහි අපි අවධානය යොමු කරමු. අපගේ ප්‍රතිපත්ති සහ ක්‍රියාවන්හි අරමුණ වන්නේ කිසිදු පුරවැසියෙකු, විශේෂයෙන් වඩාත්ම අවදානමට ලක්විය හැකි අයව ඉතිරි නොවන බව සහතික කිරීමයි. මීට පෙර අපට අතපසු වූ විද්‍යාව හා තාක්‍ෂණයේ දියුණුව වැළඳ ගැනීම සඳහා ආර්ථිකය ඩිජිටල්කරණය කිරීමට ද පියවර ගෙන ඇත. “ඊට අමතරව, ශ්‍රී ලංකාවේ ගෝලීය ප්‍රතිරූපය – දූෂිත පාලනය සඳහා ප්‍රසිද්ධ රටක සිට ස්වාධීන විදේශ ප්‍රතිපත්තියක් ආරක්ෂා කරන සහ ජාත්‍යන්තර සබඳතා කෙරෙහි විශ්වාසය දිනා ගන්නා රටක් බවට පරිවර්තනය කිරීමට අපි කැපවී සිටිමු.
“පසුගිය දූෂිත දේශපාලන ක්‍රමයේ අසංඛ්‍යාත බාධක සහ ගැඹුරට මුල් බැසගත් දෝෂ මධ්‍යයේ වුවද, පුරවැසියන්ගේ සාමූහික කැමැත්තෙන් ගොඩනැගුණු ජනතා රජය ක්‍රමානුකූලව ඉදිරියට යමින් සිටී. පොරොන්දු වූ පරිදි, අපි ශ්‍රී ලංකාව ජාතික පුනර්ජීවනයේ යුගයකට සාර්ථකව ගෙන ගියෙමු. දැන්, ඉදිරි කර්තව්‍යය වන්නේ මෙම පදනම මත ක්‍රමානුකූලව ගොඩ නැගීම සහ නොසැලෙන විශ්වාසය හා නිර්මාණශීලිත්වය සමඟ සියවස් ගණනාවක් පැරණි සිහිනය සැබෑ කර ගැනීමයි.
“මෙම 77 වන ජාතික නිදහස් දිනයේදී, ශක්තිමත්ව හා එකමුතුව නැගී සිටින ලෙසත්, නිදහස පිළිබඳ නවීන දැක්මක් සැකසීමට සහභාගී වන ලෙසත්, මෙම නව පුනර්ජීවන යුගයේ සාමූහික ආරම්භයට දායක වන ලෙසත් මම සියලුම ශ්‍රී ලාංකිකයින්ට ආරාධනා කරමි.”
