ඩිජිටල් ජාතික හැඳුනුම්පත් මේ මාසයේ සිට – ඩිජිටල් ආර්ථික නියෝජ්‍ය ඇමති
දීර්ඝ කාලයක් තිස්සේ බලා සිටි ඩිජිටල් ජාතික හැඳුනුම්පත මේ මස ආරම්භ වන බව ඩිජිටල් ආර්ථික නියෝජ්‍ය අමාත්‍ය එරංග වීරරත්න මහතා අද (14) පැවති මාධ්‍ය හමුවකදී ප්‍රකාශ කළේය.
“සියලුම නව ජාතික හැඳුනුම්පත් ඩිජිටල් ආකෘතියෙන් නිකුත් කෙරෙන බව ” නියෝජ්‍ය අමාත්‍යවරයා අවධාරණය කළේ පුරවැසියන් හැඳුනුම්පත් ලබා ගැනීමේදී දැනට මුහුණ දෙන ප්‍රමාදයන් ඉවත් කිරීම මෙමගින් හැකි වන බවයි.
මෙම ව්‍යාපෘතිය සඳහා ඇස්තමේන්තුගත මුදල රු. බිලියන 20 කි. එම ව්‍යාපෘතියේ පිරිවැයෙන් අඩක් පියවන්නේ ඉන්දීය රජයෙන් ලැබෙන ආධාර මගිනි. එමඟින් අපට ඇති මූල්‍ය බර ලිහිල් වන බව නියෝජ්‍ය අමාත්‍යවරයා සඳහන් කළේය.
“මෙය ඩිජිටල් යුගය වැලඳගැනීමේ සහ රාජ්‍ය සේවාවන්හි කාර්යක්ෂමතාව සහතික කිරීමේ ප්‍රධාන පියවරකි” යනුවෙන් වීරරත්න මහතා වැඩිදුරටත් සඳහන් කළේ මෙම මුලපිරීම පුරවැසියන් කෙරෙහි ඇති කරන ධනාත්මක බලපෑම පිළිබඳව සුබවාදී අදහස් පළ කරමිනි.
