දුෂ්කර ප්‍රදේශවලට වැඩි මුල්‍ය පහසුකම් ලබා දෙමින් යටිතල පහසුකම් දියුණුකරන්න අවශ්‍යයි
නව අධ්‍යාපන ප්‍රතිසංස්කරණ වෙනුවෙන් පාසල් තුළ යටිතල පහසුකම් සංවර්ධනය කිරීමේදී දුෂ්කර පළාත්වල පාසල් සඳහා මූල්‍ය පහසුකම් වැඩිවශයෙන් ලබා දෙමින් පාසල් දියුණු කිරීමට අවශ්‍ය බව අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍ය, අග්‍රාමාත්‍ය ආචාර්ය හරිනි අමරසූරිය පැවසුවා ය.
නව අධ්‍යාපන ප්‍රතිසංස්කරණ ක්‍රියාවලිය තුළ පලාත් සහ කලාප මට්ටමින් ලැබිය යුතු දායකත්වය පිළිබඳ ආණ්ඩුකාරවරුන් සහ පළාත් ලේකම්වරුන් දැනුවත් කරමින් ජූලි 05 දින අරලියගහ මන්දිරයේ පැවති සාකච්ඡාවකදී අග්‍රාමාත්‍යවරිය මේ බව පැවසීය.
එහිදී වැඩිදුරටත් අදහස් දක්වමින් අග්‍රාමාත්‍ය ආචාර්ය හරිනි අමරසූරිය මෙසේද සඳහන් කළාය.
ඉතාම හොදින් සැලසුම් කරමින් ක්‍රියාත්මක කරන්න නියමිත අධ්‍යාපනය පරිවර්තනය පිළිබඳ සාකච්ඡා කර නිසි පරිදි ක්‍රියාත්මක කිරීමට පළාත් සභාවල සහය අවශ්‍යයි. ජාතික ප්‍රතිපත්තිය සහ පළාත් සභා ක්‍රියාවලිය ඒකාබද්ධ කරමින් මේ අධ්‍යාපන ප්‍රතිසංස්කරණ ක්‍රියාවලිය ක්‍රියාත්මක විය යුතුයි. අධ්‍යාපන ප්‍රතිපත්ති වල පරස්පරතාවයක් ඇති නොවන විදිහට පවත්වාගෙන යෑමේ වැදගත්කම අපිට හොඳටම දැනිලා තියෙනවා. විශේෂයෙන්ම මේ අධ්‍යාපන ප්‍රතිසංස්කරණයේ අරමුණ වෙන්නේ අධ්‍යාපනයේ ගුණාත්මක භාවය ඉහළ නැංවීමයි. ඒකේ අවසාන ප්‍රතිලාභය ලැබිය යුත්තේ පාසල් යන දරුවන්ට සහ ඒ දෙමව්පියන්ට වගේම ඒ පවුලටයි. අපි ගන්න හැම තීරණයක්ම ගත යුත්තේ දරුවා ගැන හිතලයි.
අධ්‍යාපන ප්‍රතිසංස්කරණයේදී අපිට අභියෝග දෙකක් තියෙනවා. එකක් පවතින අධ්‍යාපන ක්‍රමය වෙනස් කරන්නත් ඕනේ. වෙනස් කරන ගමන් තියෙන ක්‍රමවේදය ටික කාලයකට පවත්වාගෙන යන්නත් ඕනේ.
කාලයක් තිස්සේ ගත්ත තීරණ නිසා ඇතිවෙලා තියෙන ගැටළුත් අපි විසඳන ගමන් අපිට මේ පරිවර්තනය කරන්න සිදු වෙලා තිබෙනවා.
පළාත් මට්ටමේ පාසල් භාරව එදිනෙදා කටයුතු කරන අතර ප්‍රතිපත්තිමය කාරණාවලදී එකඟතාවයක් ඇතිව වැඩ කරන්න අවශ්‍ය බවද අග්‍රාමාත්‍යවරිය මෙහිදී පැවසීය.
මෙම අවස්ථාවට අධ්‍යාපන උසස් අධ්‍යාපන නියෝජ්‍ය අමාත්‍ය වෛද්‍ය මධුර සෙනෙවිරත්න, වෘත්තීය අධ්‍යාපන නියෝජ්‍ය අමාත්‍ය නලින් හේවගේ, අග්‍රාමාත්‍ය ලේකම් ප්‍රදීප් සපුතන්ත්‍රි, අධ්‍යාපන අමාත්‍යංශයේ ලේකම් නාලක කලුවැව ඇතුළු ආණ්ඩුකාරවරුන්, පළාත් ලේකම්වරුන්, පලාත් අධ්‍යාපන අධ්‍යක්ෂකවරුන්, මහා භාණ්ඩාගාරය, මුදල් කොමිසම, අධ්‍යාපන අමාත්‍යංශය නියෝජනය කරන නිලධාරීන් පිරිසක් සහභාගී වුහ.
