යෝෂිත අත්අඩංගුවට ගැනීම පිටුපස දේශපාලන දඩයමක් නැහැ – කැබිනට් ප්‍රකාශක
යෝෂිත රාජපක්ෂ හිටපු ජනාධිපති මහින්ද රාජපක්ෂ මහතාගේ පුත්‍රයා නිසා පමණක් අත්අඩංගුවට නොගත් බව පවසන කැබිනට් ප්‍රකාශක අමාත්‍ය නලින්ද ජයතිස්ස මහතා නීතිවිරෝධී ලෙස හෝ සැක කටයුතු ලෙස ඉඩම් හෝ දේපළ මිලදී ගෙන තිබේ නම් අද නීතිය ක්‍රියාත්මක කරන බව ප්‍රකාශ කළේය.
රජයේ ප්‍රවෘත්ති දෙපාර්තමේන්තුවේ පැවති විශේෂ මාධ්‍ය හමුවකට එක්වෙමින් ඔහු කියා සිටියේ පසුගිය කාලයේ සිදු වූ අත්අඩංගුවට ගැනීම් පිටුපස ඇතැමුන් කියන ආකාරයේ දේශපාලන දඩයමක් නොමැති බවයි.
“යමෙක් නීතිවිරෝධී ලෙස හෝ සැක කටයුතු ලෙස ඉඩම් හෝ දේපලක් මිල දී ගෙන තිබේ නම් සහ එවැනි සිද්ධීන් සම්බන්ධයෙන් සීඅයිඩී පරීක්ෂණ පවත්වනවා. යෝෂිත අත්අඩංගුවට ගත්තේ ඔහු මහින්ද රාජපක්ෂගේ පුතා නිසා නොවේ,” ඔහු පැවසීය.
ආරම්භ කර තිබූ පරීක්ෂණ තවදුරටත් ක්‍රියාත්මක බවත් අපරාධ පරීක්ෂණ දෙපාර්තමේන්තුව සහ පොලිසිය අධිකරණයට කරුණු ඉදිරිපත් කර ඒ අනුව අත්අඩංගුවට ගැනීම් සිදුකරන බවත් අමාත්‍යවරයා පැවසීය.
අත් අඩංගුවට ගත් සැකකරුවන්ට ඇප ලබාදීම සම්බන්ධයෙන් ඇසූ ප්‍රශ්නයකට පිළිතුරු දෙමින් ඔහු කියා සිටියේ “ඔවුන්ට ඇප ලැබේවි. නමුත්, නීතිමය නඩුව දිගටම පවතිනවා. නීතිය ක්‍රියාත්මක කිරීම අධිකරණයේ යුතුකමක්. රජය ඊට පහසුකම් සපයනවා පමණයි.”
