රාජ්‍ය ව්‍යවසාය සඳහා කොටස් වෙළෙඳපොළ ඒකාබද්ධ කිරීමේ හැකියාව පිළිබද ජනාධිපති සොයා බලයි
ඇතැම් රාජ්‍ය ව්‍යවසායන් හෝල්ඩින් සමාගමක් හරහා කොටස් වෙළෙඳපොළට ඒකාබද්ධ කිරීමේ හැකියාව රජය සොයා බලන බව ජනාධිපති අනුර කුමාර දිසානායක මහතා නිවේදනය කළේය.
28 වැනිදා කොළඹදී පැවැති ‘2025 ශ්‍රී ලංකා ආර්ථික සමුළුව’ අමතමින් ඔහු මේ බව ප්‍රකාශ කළේය.
පාඩු ලබන ආයතන සඳහා ව්‍යුහාත්මක වෙනස්කම් ක්‍රියාත්මක කිරීමට රජය සූදානමින් සිටින බව ජනාධිපතිතුමා අවධාරණය කළේය. ඔහු ප්‍රකාශ කළේ ‘අපි මේ ආයතන දෙස බලන්නේ පැරණි දෘෂ්ටිකෝණයකින් නොවෙයි.
ව්‍යුහාත්මක වෙනස්කම් සඳහා අපි සූදානම්. විශේෂයෙන්ම ආයතන සහ මණ්ඩල සලකා බලා මෙම ආයතන ඒකාබද්ධ කර කොටස් වලින් කොටසක් හෝල්ඩින්ග් සමාගමක් හරහා නිකුත් කළ හැකිද යන්න අපි දැනට අධ්‍යයනය කරමින් සිටිමු.’
ඇතැම් ආයතන වසා දැමීමට, ඒකාබද්ධ කිරීමට හෝ ඒවායේ අවධානය වෙනතකට යොමු කිරීමට සිදු විය හැකි බව ද ජනාධිපතිවරයා සඳහන් කළේය.
මීට අමතරව, සංශෝධිත ආර්ථික පරිවර්තන පනත කෙරෙහි විශ්වාසය පළ කළ ඔහු මේ වසරේ සංචාරකයින් මිලියන 2.5 ක් මෙරටට පැමිණෙනු ඇතැයි අපේක්ෂා කළේය.
