දූෂණය වැලැක්වීම සදහා සියලුම රාජ්‍ය ආයතනවල අභ්‍යන්තර කටයුතු ඒකක පිහිටුවීම තීරණය කරයි
ඵලදායී මහජන සේවාවන් සහතික කිරීම සඳහා සියලුම රාජ්‍ය ආයතනවල අභ්‍යන්තර කටයුතු ඒකකයක් පිහිටුවීමට තීරණය කර ඇත.
ඊට අදාළ චක්‍රලේඛය ජනාධිපති ලේකම් ආචාර්ය නන්දික සනත් කුමානායක විසින් නිකුත් කර ඇති බව වාර්තා වේ.
මෙම ඒකකය පිහිටුවීමේ මූලික අරමුණ වන්නේ දූෂණය වැලැක්වීම, රාජ්‍ය ආයතන තුළ අඛණ්ඩතාවයේ සංස්කෘතියක් පෝෂණය කිරීම, විනිවිදභාවය සහ වගවීම සහතික කිරීම, සදාචාරාත්මක පාලනය ප්‍රවර්ධනය කිරීම සහ නීතිය ක්‍රියාත්මක කිරීමේදී අල්ලස් හෝ දූෂණ චෝදනා විමර්ශන කොමිෂන් සභාව (CIABOC) සමඟ සහයෝගයෙන් කටයුතු කිරීමයි.
සියලුම රාජ්‍ය ආයතනවල අභ්‍යන්තර කටයුතු ඒකකය විශේෂ ඒකකයක් ලෙස ස්ථාපිත කරන ලෙස ජනාධිපති ලේකම්වරයා උපදෙස් දී තිබේ. පළමු පියවර ලෙස එය සියලුම කැබිනට් අමාත්‍යාංශවල, පළාත් ප්‍රධාන ලේකම් කාර්යාලවල සහ ප්‍රාදේශීය ලේකම් කාර්යාලවල ස්ථාපිත කෙරේ.
මීට අමතරව, මෙම අභ්‍යන්තර කටයුතු ඒකක පිහිටුවීම සම්බන්ධයෙන් ජනාධිපති ලේකම්වරයා විසින් අමාත්‍යාංශ ලේකම්වරුන්, පළාත් ප්‍රධාන ලේකම්වරුන් සහ දිස්ත්‍රික් ලේකම්වරුන් වෙත ලිඛිත නියෝගයක් නිකුත් කර ඇත.
