මෙවර අයවැය ස්ථාවර ආර්ථිකයක් සඳහා අඩිතාලම දමයි
පසුගිය පාලන සමයේ රාජ්‍ය මූල්‍ය අවභාවිතය හේතුවෙන් රට බංකොලොත් වී ඇති බවත්, ජාත්‍යන්තර මුල්‍ය අරමුදලේ (IMF) වැඩසටහනේ පරිවාස කාලයක් යටතේ මේ වන විට ක්‍රියාත්මක වන බවත් ජනාධිපති අනුර කුමාර දිසානායක මහතා අවධාරණය කළේය. මෙම තත්ත්වය හමුවේ ශක්තිමත් සහ ස්ථාවර ආර්ථිකයක් ගොඩනැගීම සඳහා 2025 අයවැය මඟින් මූලික පියවර ගෙන ඇති බව ඔහු අවධාරණය කළේය.
ජනාධිපතිවරයා මේ අදහස් පළ කළේ කොළඹ විශ්වවිද්‍යාලයේ ව්‍යාපාර පරිපාලනය පිළිබඳ ශාස්ත්‍රපති (MBA) ආදි ශිෂ්‍ය සංගමය විසින් සංවිධානය කරන ලද පසු අයවැය සංසදය 2025 සඳහා කොළඹ සිනමන් ලයිෆ් හෝටලයේදී ඊයේ (19) එක්වෙමිනි.
ණය ප්‍රතිව්‍යුහගත කිරීම තුළින් ලබා දී ඇති තෙවසරක ණය සහන කාලය ඵලදායී ලෙස ප්‍රයෝජනයට ගෙන වසර 2028 වන විට ණය ආපසු ගෙවීමේ හැකියාව යළි ලබා ගැනීම සඳහා විධිමත් ආර්ථික කළමනාකරණයක් ක්‍රියාත්මක කිරීම රජයේ අරමුණ බව ජනාධිපති අනුර කුමාර දිසානායක මහතා ප්‍රකාශ කළේය.
ලෝකයේ බොහෝ රටවල් බංකොලොත්භාවයට පත්වීමෙන් පසු යථා තත්ත්වයට පත්වීමට දශක ගණනාවක් ගත වී ඇති අතර, ශ්‍රී ලංකාව සැලකිය යුතු කෙටි කාලයක් තුළ යථා තත්ත්වයට පත් වනු ඇතැයි අපේක්ෂා කරන බව ජනාධිපතිතුමා වැඩිදුරටත් සඳහන් කළේය.
රාජ්‍ය ආදායම දළ දේශීය නිෂ්පාදිතයෙන් (GDP) 15.1% දක්වා ඉහළ නැංවීමට මෙවර අයවැයෙන් යෝජනා කර ඇති බව ද පෙන්වා දුන් ජනාධිපතිතුමා හඳුනාගත් ජාතික ප්‍රමුඛතා මත පදනම්ව වියදම්වලට ප්‍රමුඛත්වය ලබාදීමට රජයේ කැපවීම අවධාරණය කළේය.
ග්‍රාමීය ප්‍රදේශවලට ආර්ථික ක්‍රියාකාරකම් මෙහෙයවමින් ආර්ථිකය පුළුල් කිරීමට සහ පුරවැසියන් ආර්ථිකයේ කොටස්කරුවන් ලෙස ඒකාබද්ධ කිරීමට මෙවර අයවැයෙන් අවධානය යොමු කර ඇති බව ජනාධිපතිතුමා අවධාරණය කළේය. මෙම ප්‍රවේශය මඟින් ජනතාවට ලබා ගත හැකි ආර්ථික ප්‍රතිලාභ ඉහළ නැංවීමට හැකි වනු ඇතැයි ඔහු විශ්වාසය පළ කළේය.
ගම් මට්ටමින් කුඩා ආර්ථික ඒකක ඇතිකර ආන්තික කණ්ඩායම් නැවත ආර්ථිකයට සම්බන්ධ කිරීමට රජය සැලසුම් කරයි. එහි ප්‍රතිඵලයක් ලෙස කුඩා හා මධ්‍ය පරිමාණ ව්‍යවසායකයන්ගේ (SMEs) ඉහළ යාමක් රට තුළ ඇති කිරීමට අපේක්ෂා කරන බව ජනාධිපතිතුමා ප්‍රකාශ කළේය.
කර්මාන්ත සඳහා සහය දැක්වීම සඳහා රජයේ කැපවීම අවධාරණය කළ ජනාධිපතිතුමා නිෂ්පාදන පිරිවැය අඩු කිරීමෙන් අවසානයේ පාරිභෝගිකයින්ට සහනයක් සැලසෙන බව සඳහන් කළේය.
ග්‍රාමීය දරිද්‍රතාවයෙන් ජාතිය නගා සිටුවීම සඳහා මෙවර අයවැයෙන් වැඩිම ප්‍රතිපාදන වෙන්කර ඇත්තේ අධ්‍යාපනයට ය. රේඛීය අධ්‍යාපන ආකෘතියක සිට වඩාත් විවිධාංගීකරණය වූ බහු දිශානුගත ප්‍රවේශයකට සංක්‍රමණය වෙමින් පාසල් පද්ධතිය තුළ මානව සහ භෞතික සම්පත් යන දෙකම ප්‍රතිව්‍යුහගත කිරීම මෙම ආයෝජනයේ අරමුණයි.
අයවැයෙන් රාජ්‍ය වියදම් කළමනාකරණයට ද ප්‍රමුඛත්වය දී ඇත. රාජ්‍ය සේවා සැපයීම හා සම්බන්ධ අධික පිරිවැය සැලකිල්ලට ගෙන, රාජ්‍ය ආයතනවල වියදම් පිළිබඳ පුළුල් සමාලෝචනයක් පැවැත්වීමට රජය අදහස් කරයි.
දූෂණයෙන් තොර දේශපාලන අධිකාරියක් පවත්වාගෙන යාමේ වැදගත්කම අවධාරණය කළ ජනාධිපතිතුමා අල්ලස ප්‍රතික්ෂේප කරන සංස්කෘතියක් පෝෂණය කිරීම පුරවැසියන්ගේ සාමූහික වගකීමක් බව අවධාරණය කළේය.
අපනයනය මත පදනම් වූ ආර්ථිකයක් ස්ථාපිත කිරීම සඳහා රජය නව වෙළඳ ගිවිසුම් අත්සන් කිරීමට සැලසුම් කර ඇති අතර මේ වසරේ ඉහළ අපනයන ආදායමක් අපේක්ෂා කරයි.
මීට අමතරව, වත්මන් පරිපාලනය අවධානය යොමු කර ඇත්තේ වරාය කේන්ද්‍ර කරගත් ආර්ථිකයක් සංවර්ධනය කිරීමට ය. කාර්යක්ෂම ප්‍රතිනැව්ගත කිරීමේ මධ්‍යස්ථානයක් පිහිටුවීම කෙරෙහි අයවැයෙන් විශේෂ අවධානයක් යොමු කර ඇත.
අනුරාධපුර, යාපහුව සහ යාපනය වැනි ප්‍රධාන නගර ප්‍රධාන සංචාරක ගමනාන්ත ලෙස සංවර්ධනය කිරීමට සැලසුම් කර ඇති නගර සන්නාම වැඩසටහන් හරහා සංචාරක ප්‍රවර්ධන වැඩසටහන් තවදුරටත් ශක්තිමත් කෙරේ.
ශ්‍රී ලංකාවට ආර්ථික අවස්ථා පුළුල් කිරීම සඳහා රටේ රාජ්‍ය තාන්ත්‍රික සේවය ප්‍රයෝජනයට ගැනීමේ අවශ්‍යතාව ද ජනාධිපතිතුමා අවධාරණය කළේය.
මෙම අවස්ථාවට ලංකා වාණිජ මණ්ඩලයේ සභාපති දුමින්ද හුලංගමුව සහ ආර්ථික කටයුතු සහ මූල්‍ය පිළිබඳ ජනාධිපති ජ්‍යෙෂ්ඨ උපදේශක, කොළඹ විශ්වවිද්‍යාලයේ MBA ආදි ශිෂ්‍ය සංගමයේ සභාපති සුරාජ් රදම්පොල මහතා ඇතුළු විද්‍යා හා ව්‍යාපාරික ක්ෂේත්‍රයේ ප්‍රවීණයන් රැසක් සහභාගි වූහ.
