ශ්‍රී ලංකාවේ සිදුවෙමින් පවතින ධනාත්මක වෙනස්කම් පිළිබඳව මාලදිවයින් විදේශ කටයුතු අමාත්‍යවරයාගේ සිය ප්‍රසාදය
ජනාධිපති අනුර කුමාර දිසානායක මහතා සහ මාලදිවයින් ජනරජයේ විදේශ කටයුතු අමාත්‍ය අබ්දුල්ලා ඛලීල් මහතා ඊයේ (පෙබ. 20) ජනාධිපති කාර්යාලයේදී හමුවිය.
මෙම රැස්වීමේදී අමාත්‍ය ඛලීල් මහතා ජනාධිපති දිසානායක මහතාට සහ අලුතින් තේරී පත් වූ රජයට ඔවුන්ගේ මැතිවරණ ජයග්‍රහණය පිළිබඳව සිය සුබ පැතුම් පිරිනැමීය. මැතිවරණයෙන් පසු ශ්‍රී ලංකාවේ සිදුවෙමින් පවතින ධනාත්මක වෙනස්කම් පිළිබඳව ද ඔහු සිය ප්‍රසාදය පළ කළේය.
ආර්ථික අභියෝග ජය ගැනීමේදී ශ්‍රී ලංකාව දක්වන ප්‍රතිරෝධය අගය කළ අමාත්‍ය ඛලීල්, තමන්ගේම ආර්ථික ප්‍රබෝධය සඳහා වටිනා පාඩම් උකහා ගැනීමට ශ්‍රී ලංකාවේ ප්‍රකෘති ප්‍රයත්නයන් මාලදිවයින සමීපව නිරීක්ෂණය කරන බව ප්‍රකාශ කළේය.
නිල රාජ්‍ය සංචාරයක් සඳහා මාලදිවයිනේ සංචාරයක නිරත වන ලෙස ඔහු ජනාධිපති දිසානායක වෙත නිල ආරාධනයක් ද කළේය.
ජනාධිපති දිසානායක මහතා ඊට ප්‍රතිචාර දක්වමින් ද්විපාර්ශ්වික සබඳතා ශක්තිමත් කර ගැනීම සඳහා මාලදිවයිනේ දක්වන කැපවීම පිළිබඳව සිය ප්‍රසාදය පළ කළ අතර දෙරට අතර සහයෝගීතාව තවදුරටත් ඉහළ නැංවීම සඳහා ශ්‍රී ලංකාවේ කැපවීම යළිත් තහවුරු කළේය.
මෙම රැස්වීමට ශ්‍රී ලංකාවේ මාලදිවයින් මහ කොමසාරිස් මසූඩ් ඉමාඩ්, විදේශ ලේකම් ෆාතිමත් ඉනායා, අතිරේක ලේකම් අමිනාත් අබ්දුල්ලා ඩීඩි සහ අනෙකුත් මාලදිවයිනේ ජ්‍යෙෂ්ඨ නිලධාරීන් සහ අනෙකුත් ප්‍රභූවරු සහභාගී වූහ.
